Acts 27

Paulo 'ina 'adau Loma manuna

1Ta ni'atu siloina 'aene Itali 'ena 'ada tauya, 'enega Paulo be 'aina yoniyonidi wate ma'enao si'ebwayaedi Sisa 'ina tolosaiyao 'adi toanugana 'enaya, 'ana esana Yuliasi, be 'ima 'adau 'ena 'i'ita'i'isidi.

2Ga Adilamitio 'enega wagega 'agelu, tauna waga nina 'iabe 'ipipili Esia le'awina 'asanao 'ediya, ga 'atupa, Alisitako ma'emai, tauna goma Masidoniana, sena Tesalonaika 'enega. 3Ta tomwa 'iulisina ga Saidoni 'ena 'alugu, ta Yuliasi Paulo 'i'atenuwa 'ole'oleyena ga 'itagwalena ga 'itauya gosenao 'ediya, be sida 'ita'i'isina. 4Ta Saidoniyega 'atupa limana ga Saipilosi gwaunega 'apili sakowasi, manuna Saipilosi matanega yagila 'ilodebedebema. 5Ta ni'atu Silisia be Pamipili olanao 'apilisinedi, ga Maila 'alugu, sena Lisia 'enaya.

6Gote 'ena tolosaiyao 'adi toanugana nina 'ebweu Alekisanidela wagana 'ilobena, 'iabe 'itutupa Itali manuna, ga 'ena 'agelubala. 7Ta 'asiyata yauna 'ima 'adau mwauna, ga Nidasi 'aloselabena, ta nigeya sawesawenaya be Nidasi matanega 'apalumo, manuna yagila sinabwana matamega, 'enega 'amwa'uta Kiliti be Salimone gamwagamwanidiyega 'asola, ga Kiliti gwaunega 'asakowasi. 8Ta dabalega 'atupa, ta yagila nina tuga 'i'ewa'ewaema ga 'amai gomwagomwa 'ebweu 'ana esana Gomwagomwa Siwalowa 'ena, 'asa Lasia le'awinaya.

9Ta tuta dudulana ni'atu 'amudalina, ga 'Ebotana 'ana tuta 'igumwala, ga yagila 'ana tuta to'umalina ni'atu 'ie'ale, 'enega Paulo 'iemataluwedi, 10'igwae, “'Inapwanao, 'ilobwenena be tada eyawai'ata gomwagomwa gete 'ena. Geya'abo tatootoo be ta'ada'adau limana, 'abona nai taesilae, be gwegwe be waga tamudalidi, be nai 'abo'ada watei tamwamwawasa.”

11Ta tolosaiyao 'adi toanugana toniwaga be waga 'ana topwalowa 'enadi 'inonodi, ta nigeya Paulo 'ina ona manuna 'inuwanuwa. 12Ta gomwagomwa nina nigeya 'ilobwelobwene bolimana 'ana tutaya, ta yaudi siona, “Tatoo tuga, be 'abo kapekapeyana Pinikisa 'ena talulugu, manuna tauna gomwagomwa bobo'ana, be 'enaya taeyawai'ata.” Ta Pinikisa nina gomwagomwana salu Kiliti 'enaya, ta 'awana yalasi be yaalata 'ilo'awasidi.

Wediliya silobena

13Ta ni'atu yalasi gidalina 'itowama, ga sinuwena 'aene 'iabe si'adau bobo'ana be Pinikisa sida lugu, 'enega loomu sikwalina ga Kiliti selabenega sipili dabalega. 14Ta tuta gidalina ga yagila tosinabwa sana, 'ana esana Lagasai, 'itowadoloma, 15ga waga nigeya sawesawenaya be 'isasasa, manuna yagila matamega 'itowatowama, 'enega tuga 'adamomo, 16ta salu gidalina 'ana esana Kiloda gwaunega 'atupatupa, ta 'aewaiwai ga waga 'ebe talaesuya 'alisi tu'eyena, 17ta balae si'ewedi ga waga sididina, ta simatauta, nai kaukau 'ana esana Silitisa 'ena situtula, ga 'enega naya sipelena ta 'adoedoema tuga.

18Ta wediliya sinabwana waga 'i'au'au bunibuni wawasae, ta tomwa 'iulisina ga waga 'ana eusana sieula mwa'utedi. 19Ta 'asiyata 'etonina 'ena waga 'ana gwegweyao si'ewedi ga sieula mwa'utedi.

20Ta 'asiyata yauna 'ediya nigeya sinala nai kwadima 'ada 'itedi, ta wediliya sinabwana 'imutumutuma, 'enega 'amwalatonina 'aene 'iabe 'amwamwawasa.

21Ta ni'atu 'asiyata yauna waga 'ana togeluyao nigeya si'e'ai, ga Paulo gamwagamwanidiya 'itoolo, ta 'igwae, “Tasigwao, 'abo 'igu ona wada nononaya, be geya'abo Kilitiyega tada gelugeluma, geya'abo sa'i mwau be esilae gete tada lobaloba. 22Ta gete yaguguyami, wada 'atepatu, geya'abo 'ebweu 'emiyega 'imwamwawasa, ta waga namo esiya 'iabe 'idadamana, 23manuna guluwanai 'igu Yaubada nina, tauna yaemisena, 'ina anilose 'imai ga selabeguya 'itoolo, 24ta 'ieonegu, ‘Paulo, geya'abo 'umatamatauta; 'iabe Sisa matanaya 'uda toolo, manuna 'imu sidasida 'enega waga 'ana togeluyao maibo'adi ma'emwao Yaubada 'ida 'etoseyemi.’ 25'Enega tasigwao, geya'abo wamatamatauta, manuna Yaubada yaemisena be 'iabe 'ida guinuwa nadigega tuga 'ie'itegu. 26Ta 'iabe salu 'ebweu 'ena tatutula.”

Waga 'itula

27Wiki 'eluwa sigumwala, 'etamo sa'i Edilia bwagabwaganaya 'adoedoe dadanema, ta niuniuwanaya waga 'ana topaisewao sinuwena 'aene dabala 'aloseloselabe. 28'Enega ni'u siulatootoona ga silobena 'ana mwa'uta nadigega tuweniti lowa 'ana dudula. Ta tupwana 'adoenao ga wate siulatoona ga silobena ni'u 'ana mwa'uta nadigega pipitini lowa. 29Ta simatauta geya'abo be gulewa 'ena 'atutula, ga waga kuliginega loomu ata siuledi, ta sisidasida tomwa manuna be 'ida ulisi manini.

30Ta 'aina waga nina 'ana topaisewao nuwanuwadi be wagega sida dena, ga waga 'ebe talaesuya sipelena ni'uya, ta sikabo 'aene loomu wate sida ule waga matanega. 31Ga Paulo tolosaiyao ma 'adi toanugana 'ieonedi, “'Abo tomota gotedi wagega sidedena, geya'abo sa'i tabobobo'ana.” 32'Enega tolosaiyao nidi waga 'ebe talaesuya 'ana balaeyao si'upwa yauledi ga 'idoena.

33Ta ni'atu tomwa 'iabe be 'iulisi, ga Paulo 'ieonedi be sida 'e'ai, 'igwae, “Ni'atu 'asiyata potini 'atesa'ala manuna ga nigeya wate 'e'ai wada lotoona. 34'Enega 'ilobweneda be tada loepa'ala, manuna geya'abo sa'i 'ebweu 'iesiesilae.”

35Ta ni'atu 'iona ga beledi 'i'ewena ta manuna 'ilokagutoki Yaubada 'ena, maibo'ama matamaya, ga 'igitomwena, ga tauna 'igimi'ai. 36Ta 'enega maibo'ama nuwama 'ibobo'ana, ga 'a'e'ai watei. 37Ta 'ama yau waga nina 'ena 'agelu nate tu analedi be sebeniti sikisi. 38Ga ni'atu gamwama 'ipawa, ga witi waga solanega siulena ni'uya, be 'aene waga 'ida kapekapeyana.

39Ta tomwa ni'atu 'iulisina ga dabala si'itena, ta nigeya si'ina'inane to 'asa, ta gomwagomwa makaukauna si'italobena, 'enega sinuwanuwa 'abo kapekapeyana waga nina silagaei dabalaya. 40'Enega loomu si'upwa yauledi ga ni'uya sigisinedi, ta wate pwalowa 'ana balaeyao sili'amidi be sipwapwalowa, ta naya nuganaya silisi tu'eyena be situtupa dabala nina manuna.

41Ta malolo 'i'ausepalema ga waga 'aetulaena kaukau lodabadabalina 'ena, ga waga 'ubusuna 'itula ta nigeya sawesawenaya be 'iloniu, ta kuligina lisu 'idi lasape'ope'oega 'iepisalina. 42Ta 'enega tolosaiyao sinuwanuwa ga 'aene yoniyonidi sida loemwawasidi, 'abona nai 'aidi sida tube'oya'a dabalaya be sidedena. 43Ta 'adi toanugana nina nuwanuwana be Paulo 'i'etoseyei, 'enega 'i'etobodedi, 'aene geya'abo siloeloemwawasidi. Ta esiya 'iloinedi taudi sawesawediya be situtube sida 'atui nugana be dabala manuna sida tube, 44be 'enega tupwa mamo waga senasenamidiyega 'atubelaga. 'Enega maibo'ama ni'atu ma ima bobo'ana 'atube'oya'a dabalaya.